Normalizimi i marrëdhënieve tregtare me Rusinë

Presidenti amerikan Barack Obama nënshkroi sot legjislacionin që normalizon marrëdhëniet tregtare me Rusinë, ndërkohë që vendos sanksione mbi zyrtarët rusë të akuzuar për shkelje të të drejtave të njeriut. 
Senati e miratoi projekt-ligjin javën e kaluar dhe tre javë më parë ai u miratua edhe nga Dhoma e Përfaqësuesve. Ligji kombinon dy masa të veçanta në një të vetme. Pjesa e parë heq kufizimet që datojnë në epokëne Luftës së Ftohtë. Ligji normalizon gjithashtu tregëtinë me Moldavinë. Pjesa e dytë u mohon vizat dhe ngrin asetet bankare të zyrtarëve rust ë dyshuar si shkelës të të drejtave.  
Ligji merr emrin e Sergei Magnitsky, një 37 vjeçar avokat rus kundër korrupsionit i cili vdiq në burg në vitin 2009 pasi zbuloi atë që e quajti një rrjet criminal të zyrtarëve që vodhën 250 milion dollarë në taksa. Legjislacioni është hartuar për të vënë në shënjestër zyrtarët rus të përfshirë në arrestimin dhe vdekjen e zotit Magnitsky.
Pjesa që trajton të drejtat e njeriut nxiti opozita nga Rusia, me presidentin Vladimir Putin që e cilësoi atë si armiqësor dhe të politizuar duke premtuar se Rusia do të japë përgjigjen e duhur.

Burimi: Telegrafi.com

Prizren: Operacion kundër krimit të organizuar

Misioni i Bashkimit Evropian për sundimin e ligjit në Kosovë bëri të ditur se janë arrestuar shtatë persona nën dyshimet për përfshirje në krim të organizuar. Në një njoftim të këtij misioni thuhet se arrestimet e shoqëruara me bastisje në tetë vendbanime, janë kryer në rajonin e Prizrenit.

Të dyshuarit janë arrestuar në kuadër të hetimit të një grupi ndërkombëtarë të krimit të organizuar dhe ata akuzohen për krim të organizuar dhe trafik të emigrantëve. Arrestimet pasojnë dy operacione të mëhershme të kryera në dhjetor të vitit 2011 dhe në prill të këtij viti, në të cilat janë arrestuar anëtarë të tjerë të dyshuar të grupit të njëjtë kriminal, thuhet në njoftim.

Operacioni po ashtu përkon me arrestimin e dyzet e pesë anëtarëve të tjerë të dyshuar të grupit kriminal i cili dje ndodhi në rajonin e Ballkanit, thuhet në njoftim por, pa dhënë hollësi të tjera.

Burimi: Telegrafi.com

Sfida për rezervat botërore të ushqimit

Këto kohë vëmendja ka qenë e përqendruar tek përpjekjet e Presidentit Obama  dhe Kongresit për të gjetur një zgjidhje ekonomike për të shmangur katastrofën fiskale. Por ish-drejtuesja e Programit Botëror të Ushqimit thotë se një shqetësim i madh duhet të jetë katastrofa e pritshme ushqimore. Korrespondenti Joe de Capua njofton:
Josette Sheeran thotë se që kur u largua në muajin prill nga Programi Botëror i Ushqimit, ka pasur kohë të reflektojë mbi masat që duhen marrë për të eliminuar urinë dhe kequshqyerjen. Zonja Sheeran foli kohët e fundit në Institutin për Kërkime mbi Ushqimin.

“E kam të qartë që në Uashington vëmendja është në shmangien e një katastrofe. Sot do të flas për një tjetër lloj katastrofe – katastrofën ushqimore. Dua të theksoj se pavarësisht se çfarë sfidash kemi përballë, këto sfida do të thellohen me shtimin çdo ditë të mijëra vetëve që kanë nevojë për ndihma ushqimore”.

Ajo thotë se 2 miliardë vetë do t’i shtohen brenda vitit 2050 sistemit të prodhimit dhe furnizimit ushqimor në botë.  

“Faktikisht, gjatë 40 vjetëve të ardhshëm duhet të prodhojmë më shumë ushqim se prodhimi i realizuar në total gjatë 8 vjetëve të kaluar. Nëse na duket se kemi probleme në përballimin e nevojave aktuale, si do të arrijmë të përmbushim nevojat e reja?”

Kombet e Bashkuara përllogarisin se aktualisht ka në botë një milliard njerëz që vuajnë nga mungesa ushqimore dhe 2 miliardë vetë që nuk marrin vlerat e nevojshme ushqimore.
Zonja Sheeran thotë se megjithëse sot në botë prodhohet ushqim i mjaftueshëm, çdo 10 sekonda një fëmijë vdes nga urija. Por shumë nga fëmijët që nuk vdesin mund të vuajnë nga mungesa ushqimore dhe urija gjatë gjithë jetës. Ajo sjell si shembull një studim të Universitetit të Kilit që ka skanuar trurin e dy tre-vjeçarëve, njëri që ka marrë vlerat e nevojshme ushqyese, ndërsa tjetri i rritur me mungesa.

“U zbulua se truri i fëmijës me mungesa ushqimore është shumë më i vogël se truri i fëmijës tjetër dhe ky problem që krijohet në vitet e para të jetës nuk mund të riparohet më vonë”.

Ajo thotë se 5 mijë ditët e para të jetës, përfshirë këtu edhe shtatzaninë, janë me rëndësi kritike për jetën e fëmijës.

Specialistja thotë se në vitet e fundit bashkëpunimi mes sektorit privat dhe atij shtetëror ka ofruar zgjidhje të suksesshme kundër kequshqyerjes si paketat me pastë të prodhuar nga farat e kikirukut.

Zonja Sheeran thotë se ushqimi me gji është thelbësor në luftën kundër kequshqyerjes. Megjithatë, kjo praktikë nuk ndiqet në masë në disa vende në zhvillim:  

“Qumshti i gjirit është përgjigja e parë në vende si Nigeri apo Mali, por në këto vende vetëm 10 për qind e grave ushqejnë fëmijët me gji, pasi nuk e konsiderojnë si të modës apo si praktikë moderne”.

Ajo thotë se gratë duhet të nxiten dhe të mbështeten kur ushqejnë fëmijën me gji. Por një tjetër problem është se shumë gra janë të kequshqyera vetë dhe duhet të krijohen programe për të ndihmuar këto gra.

Ajo propozon programe për të nxitur fermerët e vegjël dhe për të mbështetur gratë në zona rurale. Urija është në masë të madhe rezultat i problemeve në infrastrukturë. Shpesh herë zgjidhja është shumë e thjeshtë  – për shembull ndërtimi i një magazine për fshatin, që të mos prishen rezervat ushqimore nga fenomenet e natyrës.

Ish-drejtuesja e Programit Botëror të Ushqimit ofron një numër rekomandimesh për të shmangur atë që e quan: katastrofa ushqimore. Ndër to përfshihet përmirësimi i programeve për ushqimin e nënës dhe foshnjave, investimet në projekte për prodhim ushqimor në vendet në zhvillim, fuqizimi i programeve të suksesshme ushqimore dhe mbështetja e projekteve për modernizimin e ekonomive bujqësore në vendet e varfëra.
Zonja Sheeran thotë se beteja kundër kequshqyerjes mund të fitohet, por kjo kërkon ndryshimin e mendësisë sonë në këtë luftë.

Burimi: Telegrafi.com

Miratohet buxheti i vitit 2013

Parlamenti i Kosovës miratoi sot buxhetin për vitin e ardhshëm dhe marrëveshjen për anëtarësimin e Kosovës në BERZH

Parlamenti i Kosovës miratoi sot buxhetin për vitin 2013, i cili është afro një miliard e 600 milionë euro. Në favor të këtij buxheti votuan 64 deputetë, 26 ishin kundër, ndërkaq 1 ishte i paanshëm.

Buxheti i vitit 2012, ishte 4 për qind më i vogël se ai i vitit që po vjen dhe ishte vlerësuar i pamjaftueshëm për rimëkëmbjen ekonomike të Kosovës dhe zbutjen e shkallës së lartë të papunësisë dhe rrjedhimisht edhe varfërisë.

Qeveria pretendon se ai është buxhet i zhvillimit ekonomik dhe sigurimit të investimeve kapitale. Por, partitë në opozitë thonë se buxheti i projektuar është buxhet i varfërisë.
Buxheti i vitit 2013 mbështetet kryesisht në të hyrat nga doganat

Në seancën e sotme Parlamenti miratoi me 89 vota për e asnjë kundër marrëveshjen për anëtarësimin e Kosovës në Bankën Evropiane për Rindërtim dhe Zhvillim.

Më 16 nëntor të këtij viti, kjo bankë e cila ka 65 anëtarë, 29 prej të cilave nuk e njohin pavarësinë e Kosovës, miratoi vendimin pranimin e Kosovës si anëtare të saj që nga 17 dhjetori i këtij viti.

Ky është institucioni i tretë ndërkombëtar financiar, pas Fondit Monetar Ndërkombëtar dhe Bankës Botërore, në të cilin po anëtarësohet Kosova.

Paralajmërimi i këtij anëtarësimi qe bërë që në mars të këtij viti, pak pas marrëveshjes së arritur ndërmjet Prishtinës dhe Beogradit për përfaqësimin rajonal të Kosovës, marrëveshje e cila  i mundësoi Serbisë të marrë statusin e vendit kandidat për anëtarësim në Bashkimin Evropian.

Të dyja vendet janë përfshirë në një valë të re bisedimesh për normalizimin e marrëdhënieve ndërmjet tyre.

Burimi: Telegrafi.com

16 të vrarë nga një shpërthim pranë Damaskut

Një makinë bombë vrau 16 persona në rrethinat e Damaskut në Siri. Makina e mbushur me eksplozivë shpërtheu sot në afërsi të një shkolle në Kantana, më shumë se 20 kilometra në jugperëndim të kryeqytetit. Shtatë nga viktimat besohet të jenë fëmijë. Më shumë se 20 nga të plagosurit janë gra dhe fëmijë.
Incidenti ndodhi një ditë pas një tjetër shpërthimi pranë ministrisë së brendshme në Siri që vrau pesë persona në Damask. 
Shpërthimet e fundit shihen si shenja të marrjeve nën kontroll të më shumë zonave nga rebelët që luftojnë regjimin e presidentit Bashar al-Assad.
Në Moskë, zëvendës ministri i jashtëm rus Mikhail Bogdanov pohoi për herë të parë se zoti Assad duket se po humbet kontroll në vend dhe se fitorja e opozitës nuk mund të përjashtohet.

Burimi: Telegrafi.com

Vazhdojnë hetimet për sulmin me armë në Kënektikat

Autoritetet amerikane ende nuk kanë konfirmuar motivet e autorit të masakrës në një shkollë fillore dje në Konektikat. Policia tha se autori i sulmit ka hyrë me forcë në mjediset e shkollës, para se të shtinte me armë zjarri në drejtim të nxënësve. Incidenti me armë zjarri në një shkollë fillore në qytetin Newtown la të vrarë 26 vetë, ndër të cilët 20 fëmijë. Qindra vetë u mblodhën dje në një kishë në qytet për të nderuar kujtimin e të vrarëve, ndërkohë që mbarë vendi është tronditur nga ngjarja. Presidenti Obama u shpreh në fjalimin e tij të përjavshëm në radio se çdo prind në Amerikë ka sot një zemër të rënduar nga dhimbja. Ai bëri thirrje për masa reale për të parandaluar tragjedi të tilla në të ardhmen.

Hollësitë mbi incidentin në shkollën fillore Sandy Hook në Njutaun të Kënektikatit vashdojnë të dalin. Policia po vazhdon të identifikojë viktimat dhe po heton motivet e krimit. Policia tha se autori i krimit është 20 vjeçari Adam Lanza i cili ishte veshur me një jelek anti-plumb dhe ishte i armatosur me tre armë gjysmë-automatike përfshirë një pushkë kur hyri në shkollë dhe vrau 26 persona, 20 prej të cilëve ishin fëmijë.

“Të gjithë ishin të frikësuar, qanin dhe në fakt unë isha e tronditur”, tha 8 vjeçarja Alexis Wasik.

Brenda 10 minutave ekipet e para të forcave speciale SWAT arritën në vendin e ngjarjes. Policia ndihmoi mësuesit e shkollës t’i nxjerrin qindra fëmijë nga shkolla dhe t’i strehojnë ata në një stacion të zjarrëfiksave aty pranë.

“Policët na thanë t’i mbyllnim sytë dhe të vraponim”, tha 9 vjeçari Ben Paley.

Pas njoftimeve për incidentin, presidenti Obama u njoftua mbi ngjarjen ndërkohë që policia kishte zbuluar skenën e dytë të krimit. Nëna e autorit të krimit Nancy Lanza, e cila besohet se ka punuar në shkollën Sandy Point, u gjet e vdekur në shtëpinë e saj.
Policia tha se Adam Lanza ka vrarë nënën e tij para se të shkonte në shkollën fillore Sandy Point ku vrau 26 persona, shumica prej tyre fëmijë. Më pas ai vrau veten.
Pak kohë pas ngjarjes, presidenti Obama iu drejtua vendit me një fjalim.

“E di që nuk ka asnjë prind në Amerikë që nuk ndjen të njëjtin pikëllim që ndjejë edhe unë. Shumica e atyre që kanë humbur jetën janë fëmijë të bukur nga mosha 5 deri 10 vjeçare”, tha presidenti Obama.

Ky është sulmi i dytë në shkollat amerikan që ka shkaktuar numër të madh viktimash. Gjatë një sulmi me armë në vitin  2007 në Universitetin Teknik të Virxhinias u vranë 32 persona.

Burimi: Telegrafi.com

Vlerësohen sukseset në luftën kundër krimit

Ambasada amerikane në Tiranë  vlerësoi sot oficerë të Policisë në Pikën e Kakavijës  për luftën kundër krimit të organizuar dhe trafikut të narkotikëve. Zv/ Ambasadori Amerikan Henry Jardin shprehu mbështetjen e qeverisë amerikane për policinë  shqiptare. Qeveria amerikane ka dhuruar për këtë pikëkalim mjete moderne kontrolli të cilat po japin rezultat në zbulimin e formave të krimit ne kufi.

Burimi: Telegrafi.com

Sfida për rezervat botërore të ushqimit

Këto kohë vëmendja ka qenë e përqendruar tek përpjekjet e Presidentit Obama  dhe Kongresit për të gjetur një zgjidhje ekonomike për të shmangur katastrofën fiskale. Por ish-drejtuesja e Programit Botëror të Ushqimit thotë se një shqetësim i madh duhet të jetë katastrofa e pritshme ushqimore. Korrespondenti Joe de Capua njofton:
Josette Sheeran thotë se që kur u largua në muajin prill nga Programi Botëror i Ushqimit, ka pasur kohë të reflektojë mbi masat që duhen marrë për të eliminuar urinë dhe kequshqyerjen. Zonja Sheeran foli kohët e fundit në Institutin për Kërkime mbi Ushqimin.

“E kam të qartë që në Uashington vëmendja është në shmangien e një katastrofe. Sot do të flas për një tjetër lloj katastrofe – katastrofën ushqimore. Dua të theksoj se pavarësisht se çfarë sfidash kemi përballë, këto sfida do të thellohen me shtimin çdo ditë të mijëra vetëve që kanë nevojë për ndihma ushqimore”.

Ajo thotë se 2 miliardë vetë do t’i shtohen brenda vitit 2050 sistemit të prodhimit dhe furnizimit ushqimor në botë.  

“Faktikisht, gjatë 40 vjetëve të ardhshëm duhet të prodhojmë më shumë ushqim se prodhimi i realizuar në total gjatë 8 vjetëve të kaluar. Nëse na duket se kemi probleme në përballimin e nevojave aktuale, si do të arrijmë të përmbushim nevojat e reja?”

Kombet e Bashkuara përllogarisin se aktualisht ka në botë një milliard njerëz që vuajnë nga mungesa ushqimore dhe 2 miliardë vetë që nuk marrin vlerat e nevojshme ushqimore.
Zonja Sheeran thotë se megjithëse sot në botë prodhohet ushqim i mjaftueshëm, çdo 10 sekonda një fëmijë vdes nga urija. Por shumë nga fëmijët që nuk vdesin mund të vuajnë nga mungesa ushqimore dhe urija gjatë gjithë jetës. Ajo sjell si shembull një studim të Universitetit të Kilit që ka skanuar trurin e dy tre-vjeçarëve, njëri që ka marrë vlerat e nevojshme ushqyese, ndërsa tjetri i rritur me mungesa.

“U zbulua se truri i fëmijës me mungesa ushqimore është shumë më i vogël se truri i fëmijës tjetër dhe ky problem që krijohet në vitet e para të jetës nuk mund të riparohet më vonë”.

Ajo thotë se 5 mijë ditët e para të jetës, përfshirë këtu edhe shtatzaninë, janë me rëndësi kritike për jetën e fëmijës.

Specialistja thotë se në vitet e fundit bashkëpunimi mes sektorit privat dhe atij shtetëror ka ofruar zgjidhje të suksesshme kundër kequshqyerjes si paketat me pastë të prodhuar nga farat e kikirukut.

Zonja Sheeran thotë se ushqimi me gji është thelbësor në luftën kundër kequshqyerjes. Megjithatë, kjo praktikë nuk ndiqet në masë në disa vende në zhvillim:  

“Qumshti i gjirit është përgjigja e parë në vende si Nigeri apo Mali, por në këto vende vetëm 10 për qind e grave ushqejnë fëmijët me gji, pasi nuk e konsiderojnë si të modës apo si praktikë moderne”.

Ajo thotë se gratë duhet të nxiten dhe të mbështeten kur ushqejnë fëmijën me gji. Por një tjetër problem është se shumë gra janë të kequshqyera vetë dhe duhet të krijohen programe për të ndihmuar këto gra.

Ajo propozon programe për të nxitur fermerët e vegjël dhe për të mbështetur gratë në zona rurale. Urija është në masë të madhe rezultat i problemeve në infrastrukturë. Shpesh herë zgjidhja është shumë e thjeshtë  – për shembull ndërtimi i një magazine për fshatin, që të mos prishen rezervat ushqimore nga fenomenet e natyrës.

Ish-drejtuesja e Programit Botëror të Ushqimit ofron një numër rekomandimesh për të shmangur atë që e quan: katastrofa ushqimore. Ndër to përfshihet përmirësimi i programeve për ushqimin e nënës dhe foshnjave, investimet në projekte për prodhim ushqimor në vendet në zhvillim, fuqizimi i programeve të suksesshme ushqimore dhe mbështetja e projekteve për modernizimin e ekonomive bujqësore në vendet e varfëra.
Zonja Sheeran thotë se beteja kundër kequshqyerjes mund të fitohet, por kjo kërkon ndryshimin e mendësisë sonë në këtë luftë.

Burimi: Telegrafi.com

Jordania dhe konflikti sirian

Vendet fqinjë me Sirinë kanë ndjekur me kujdes luftën civile që po zhvillohet pranë tyre dhe që nganjëherë kapërcen kufirin. Ndryshe nga Turqia dhe Iraku, Jordania është përpjekur të qëndrojë neutrale në këtë konflikt. Por siç njofton korrespondentja e Zërit të Amerikës Elizabet Arrot nga Lindja e Mesme, ka shenja që mbretëria e Jordanisë, edhe pse me hezitim, mund të përfshihet në konflikt.

Në kushtet kur problemet politike dhe ekonomike brenda vendit po shtohen, gjëja e fundit që mund të duan shumë jordanezë, është konflikti me Sirinë fqinjë.
 
“Interesat e Jordanisë diktojnë që Jordania të mos ndërhyjë.”

Analisti politik Labib Kamhawi thotë se këto interesa mund të jenë të dytat në rradhë, pas çështjeve më të mëdha.
“Duket se presioni nga jashtë është i madh, nga Shtetet e Bashkuara dhe Evropa, si dhe nga vendet rajonale të Gjirit Persik dhe Arabia Saudite. Kjo do të thotë që Jordania do të detyrohet t’i hapë dyert për një ndërhyrje të mundshme ushtarake, qoftë me burime humane, me armë ose logjistike dhe kjo po ndodh.”

Shtetet e Bashkuara, aleat i rëndësishëm i Jordanisë, kanë çuar një kontingjent të vogël ushtarak në mbretëri. Misioni nuk është i qartë me saktësi. Hassan Barari, profesor i Studimeve Ndrërkombëtare në Universitetin e Jordanisë, thotë se është e rëndësishme përfshirja amerikane.
 
“Komuniteti ndërkombëtar do që Jordania të luajë rol në Siri. Jordania nuk mund ta bëjë e vetme këtë, prandaj nevojitet mbështetja, në veçanti ajo amerikane.”

Damasku është rreth 100 kilometra në veri dhe forcat kryengritëse që përpiqen për rrëzimin nga pushteti të Presidentit sirian Bashar al Assad e shohin Jordaninë si një rrugë të rëndësishme kalimi për forcat rebele, që përpiqen të marrin kontrollin e kryeqytetit.
“Në Siri kanë hyrë fshehurazi armë, por një sasi tepër e vogël, jo e mjaftueshme për të provokuar sirianët. Por të paktën tani Jordania po jep përshtypjen se është gati ta bëjë një gjë të tillë”, thotë analisti Barari.

Rreziku i hakmarrjes nga Siria u shtua disa muaj më parë, kur zyrtarët jordanezë thane se kishin zbuluar një komplot për sulm prej militantëve nga Siria.

“Askush nuk mund të pretendojë që komplotistët i çoi regjimi sirian, por sapo Jordania të përfshihet në konflikt, ndoshta do të ketë një front lufte për Jordaninë.” 

Ndërsa qeveria siriane lufton për mbijetesë, tani ka dalë një tjetër kërcënim. Burime të zbulimit amerikan thonë se Siria mund të jetë duke u përgatitur të dislokojë armë kimike. 
Analisti politik Kamhawi thotë se besueshmëria e Shteteve të Bashkuara është dëmtuar për çështje të kësaj natyre për shkak të luftës në Irak. Ai thotë se situata e atëhershme hedh dyshime tek pretendimeve të tanishme.

“Në se ne pranojmë argumentin se nga armët kimike të Sirisë vjen një rrezik i menjëhershëm, në këtë rast kemi të bëjmë me një ftesë për ndërhyrje nga jashtë në Siri.”

Të dy analistët mendojnë se, pavarësisht nga ajo që duan jordanezët, në fund të fundit ata nuk kanë zgjedhje.
“Unë mendoj, – thotë professor Barari, – se në fund të fundit, Jordania do ta kuptojë se është me të vërtetë e vështirë të mbash një qëndrim të pavarur nga ajo që kërkojnë amerikanët.”

Ndërkohë, jordanezët janë duke ndjekur me kujdes situatën dhe janë në pritje.

Burimi: Telegrafi.com

Asnjë përparim në përpjekje për uljen e borxhit

Një marrëveshje për të pakësuar borxhin kombëtar të Amerikës, nuk është arritur ende, tre javë para një afati, skadimi i të cilit do të sillte rritje taksash dhe shkurtime buxhetore, e ashtuquajtur katastrofë fiskale. Dhoma e Përfaqësuesve i ka mbyllur punimet për këtë javë pa ndonjë përparim në afrimin e qëndrimeve mes kryetarit të saj dhe Presidentit Barack Obama për një marrëveshje që do të shmangte pasoja serioze financiare dhe ekonomike për amerikanët në vitin e ri.
Krerët e demokratëve dhe republikanëve në Kongres bien dakord për diçka: bisedimet për reduktimin e borxhit janë të bllokuara. Dhe në mes të bllokimit, një paralajmërim nga shefi i Bankës Qendrore amerikane Ben Bernanke, për pasojat a mungesës së një marrëveshjeje deri në fund të vitit.

“Mendoj se ekonomia do të shkojë drejt greminës. Është me të vërtetë shqetësuese”.

Cili është shqetësimi? Shkurtimet e thella të shpenzimeve do të kufizojnë aktivitetin federal, që nga ndërtimi në autostrada deri tek siguria në aeroporte, e deri tek programet e arsimit. Njëkohësisht, skadimi i lehtësimit të taksave, mund të ngadalësojë shpenzimet e konsumatorëve, duke detyruar bizneset të shkurtojnë prodhimin dhe të shtyjnë marrjen në punë.

Presidenti i Saks Fifth Avenue.

“Sigurisht që do të jemi të kujdesshëm. Shpresoj të gjendet një zgjidhje për katastrofën fiskale”.

Edhe fermerët e Amerikës mund të vuajnë pasojat. Taksa më të larta do të shkaktonin probleme për fermat familjare thotë ekonomisti Matt Erickson.

“Një ndër 10 fermave mund t’i duhet të paguajë taksa. Si do ta nxisë kjo sipërmarrjen në Amerikën rurale nëse fermerëve do t’u duhet të shesin tokën, ndërtesat dhe gjëra të tjera të ngjashme për të paguar taksat?”

Me bllokimin e negociatave, të gjitha palët akuzojnë njëra-tjetrën.  Kreu republikan i Dhomës së Përfaqësuesve, John Boehner:

“Për fat të keq, Shtëpia e Bardhë nuk po mendon seriozisht për të ulur shpenzimet”.

Zëdhënësi i Shtëpisë së Bardhë Jay Carney fajëson republikanët se po kundërshtojnë rritjen e taksave për më të pasurit.

“Nuk është një qëndrim i pranueshëm të kesh si përparësi uljen e taksave për të pasurit. Nuk është politikë e mirë ekonomike. Nuk e përballojmë dot dhe nuk është e drejtë”.

Disa republikanë po fillojnë ta pranojnë propozimin e presidentit Obama për shkurtime taksash për të gjithë përveç 2 për qind më të pasurve. Por kongresmeni republikan Paul Broun nuk është dakord.

“Ne nuk duhet t’ia ngremë askujt taksat për asnjë arsye. Qeveria ka fonde të tepërta. Duhet të frenojmë shpenzimet”.

Shumë demokratë kundërshtojnë thirrjet republikane për të shkurtuar programet federale që japin ndihmë ekonomike për pensionistët.

Rezerva Federale nuk e shpëton dot ekonominë nëse nuk ka marrëveshje, paralajmëron Ben Bernanke.

“Nuk mund t’i kompensojmë të gjitha pasojat e katastrofës fiskale. Do të ishin shumë të rënda”.

Zoti Bernanke propozon shmangien e tronditjeve afatshkurtra financiare, ndërsa punohet për reduktimin afatgjatë të defiçitit. Demokratët dhe republikanët janë në një mendje për objektivin, por mbeten të ndarë për rrugën e realizimit të tij.

Burimi: Zeri i Amerikes